جمال مبارك .... فاشل زي ابوة

داخل البوست :

صكوك جمال مبارك للشعب ولا للنهب
السيناريو المتوقع لتمرير المشروع
اين كانت هذه الفكرة قبل خصخة الشركات السابقة

اخر حاجه كنت اتصورها ان اسم النبي حارسه وصاينه جمال مبارك يطلع مشغول بينا ، لا وبيفكر في مصلحتنا كمان

، وان يا عين مامته سهران طول الليل في شرم هو وجيجي يفكروا حيدلعونا ازاي ...؟؟؟؟

من خبرتنا 25 سنه مع الحج والده وقابليه 7000 سنه فراعنه,فصعب جدا حد يحكم البلد دي ويكون قلبه علينا او يكون بيفكر اصلا

الموضوع غريب ومريب وعجيب !!

فجيمي من اول ما ابتدى يبقى عنده وجهات نظر ومصر بتجيب ورا ، مرة احتكار و مرة غلاء اسعار واضرابات و.. و.. و.. و كل ده من غير ما يمد ايده وسايب الطبخه للبشمهندسين عز والشله ما باللك ولوحط صوابعه فيها حتخرب اكتر من كده ايه؟!

جمال كانت غزالته رايقه على الاخر وهو بيكتب المشرع ده ، وشكل الوحي اللي جابله الفكرة عدى الاول على الباطنيه واخدله جوب معتبر هناك

والحكاية ان جمال قرر اخيرا يرجع الحق لاصحابه ، وبعيد عن هو ايه الحق؟ ومين هما اصحابه دول؟ ولا مين اللي كان واخده؟ وليه مرة واحده كده عايز يرجعه (زهق منه ولا ايه )؟ ومين اصلا اللي عين جمال موزع لحقوقنا؟

لكن واضح ان ولي العهد ناوي يبدأ عهده ببتر اخر وعود انقلاب 1952 بان نصبح دولة محترمه

السيناريو المتوقع لتمرير مشروع توزيع الصكوك على شعب مصر المنحوسه

- بعد سلق المشروع وتتبيله يعرض على مجلس الشعب وبداخل الجلسه

1. زكريا عزمي يشدد على ضرورة وضع ضوابط لحماية الفقراءوتأمينهم وطبعا كام كلمه حلوين للريس


2. احمد عز يؤكد على ان المشروع هو ثورة جديده (للثورجي) بتاعنا (جيمي) واننا بصدد نقله اكبر من نقل مبارايت كاس العالم .


3. طلعت السادات يمارس هوايته ويردح ربع ساعه لعز وشلته ولو لقى الكاميرا مش زوم عليه ممكن يقلع الجزمة تاني


4. -رجب حميده يعلن عن وجود مستندات تثبت ان المشروع اسرائيلي واسمه الاصلي (شخانيم العيزر) وتعني بالعربيه (حنجيب درفها )ومش حينسى يشتم في ايمن نور ويتهمه بتظبيط المشروع مع الحكومه


5. نواب الاخوان يعلنوا مقاطعتهم للمشروع ويشبهوة بخيانة عبد الناصر لوعوده معهم


6. فتحي سرور ينهي الجلسه بكلمته المشهورة ( موافقة )

في الجامعات

1. حركة شباب من اجل التغيير تنظم مسيرة مندده بالمشروع


2. طلاب الاخوان يهتفون مدد يا رسول الله


3. شباب 6 ابريل يقيمون اعتصام امام مبنى جامعة الاسكندرية بالشاطبي
   
   

مانيشتات الصحف في اليوم

الاهرام : اهتمام عالمي بانجاز مبارك و جمال يؤكد: اجراءات نقل الصكوك ستتم بمنتهى الشفافيه

الاخبار :‏ الرئيس لم يبخل بجهد ولم يتردد في تطبيق المشروع

الجمهورية : الشعب المصري يرقص ويهتف بنحبك يا جمال

الدستور : باعوها ... وقعدوا على تللها

المصري اليوم : مجدي الجلاد يكتب : ماذا بعد الصك؟!

الفجر: سر الفتاة التي زارت زكريا عزمي قبل 10 دقائق من اقرار المشروع.

الشعب المصري

سيمارس هوايته هو الاخر وسيظل مشاهدا ولن يتحرك وسيواصل سكوته كما سكت من قبل عن فرعون

ولو تمخض الشعب المصري فلن يخرج اكثر من جروب

على الفيس بوك