ساحرة يا بلدى وجمالك طبيعى

...من قيمة كام يوم ماشى فى شوارعنا اللى بيقولوا عليها ساحرة وجملية وفيها مناظر طبيعية وانا ماشى ومنسجم بالجو الجميل شوفت حاجة بتدل على عظمة بلادنا وعلامة سياحية من اثار بلادنا.
.. شوفت ايه بقى؟؟..
... طبعا مش هشوف فى الشارع وانا ماشى تمثال تون عنخ امون ولا هشوف اهرامات الجيزة عندنا فى مطروح يعنى.
بس شوفت حاجة اهم وحاجة بنشوفها فى كل حتة شوفت خير الله اما اجعله خير كوم زباله كبيييير اوى الحقيقة انا مكنتش حاطط فى بالى ومختش بالى من العلامة السياحية الكبرى دى غير لما شوفت جنبها واحدة اجنبية امورة اوىسنها صغير اوى يمكن ما يعديش ال 80 سنة كدا لفتت نظرى ليها اوى لما لاقيتها بتجرى وبتتنطط وبتقول جمل غريبة اوى حسيت انها معجبة اوى بالمنظر الصراحة وهى بتقول ( اوه نو نو نو وات زيييس نو نو نو ) الحقيقة انا قلت فعلا احنا عندنا الاثار مترمية فى كل حتة بعد ما شوفت الاعجاب الكبير ده من الاجنبية دى بصحيح سااااحرة يا بلدنا وجمالك طبيعى...