معكم من هذا الفضاء الانترنتي الواسع ......ومحدش ليه كلمه عليه

لا مؤاخذه .
كان لازم ابدا في البوست اللي فات (اللي هو اول بوست)سلامات وعاملين ايه وحبة الحبشتكانات ديه وانا كنت ناوي والله ومحضر حبة اسطوانات تحيه وحب اروش من البيت بيتك نفسه بس لما شفت الصوره مع ابراهيم (صاحبي) جاتني حالة تجلى صحفي مفاجأ مقدرتش استنى وبعدين ملحوقه تتعوض مساء الفل او صباح مش فارقه .
وبص يا سيدي انا حنجزلك الحوار واقريك على الليله كلها الاول لما جاتني فكرة المدونه ديه ( حلاوة روح ) كان نفسي نتلم انا واصحابي في حاجه تلمنا بدل السنكحه في الفيس بوك والمنتديات والشات واللي شجعني ان انا والصغير والشربتلي كل واحد مننا عنده اهتمامات غير التاني واصحاب مووت بيني وبينك اللي شجعني على المدونه اكتر مش كده وبس انما المساحه الاعلاميه الهاي اللي ميديهالنا الحج BLOGSPOT ربنا يكرمه وانك تكتب الي انت عايزه بمزاجك مش بمزاج حد تاني حاجه كده تفكرك بالزمن الجميل ايام المرحوم حريه الراي والمواطن الهي يفشفش الطوبه اللي تحت راسهم , المهم مكدبتش خبر ورحت قلت للصغير وهو كمان مكدبش خبر وراح قال للشربتلي وعلى الشمندوره ( قهوه اسكندراني ) ظبطنا الكلام
وعلى رائي حسن (صاحبي ) دول بقوا اكتر من الارزلكن المدونه ديه حاجه تانيه كذا لون من الكتابة انا والصغير والشربتلي كمان انفرادات وملفات جريئه بتفتح وربنا يقدرنا (ويستر) وتحقيقات يعني من الاخر حالة تنفيس صحفي بدل ما تجيلنا تخمة او تقدر تقول حلاوة روح واكيد حسيتوا ده من البوست الاول ولسه كتير

ومن هذا الفضاء الانترنتي الواسع اعلن ابتداء اول مدونه جرناليه (اللي هي ابتدت اصلا ) على مزاج اصحابها ومحدش ليه كلمه عليا .

واشوف وشكم بخير
باي